अयोध्याकाण्ड 06 (301-326)

प्रभु पद पदुम पराग दोहाई। सत्य सुकृत सुख सीवँ सुहाई॥

सो करि कहउँ हिए अपने की। रुचि जागत सोवत सपने की॥

सहज सनेहँ स्वामि सेवकाई। स्वारथ छल फल चारि बिहाई॥

अग्या सम न सुसाहिब सेवा। सो प्रसादु जन पावै देवा॥

अस कहि प्रेम बिबस भए भारी। पुलक सरीर बिलोचन बारी॥

प्रभु पद कमल गहे अकुलाई। समउ सनेहु न सो कहि जाई॥

कृपासिंधु सनमानि सुबानी। बैठाए समीप गहि पानी॥

भरत बिनय सुनि देखि सुभाऊ। सिथिल सनेहँ सभा रघुराऊ॥

छंद– रघुराउ सिथिल सनेहँ साधु समाज मुनि मिथिला धनी।

मन महुँ सराहत भरत भायप भगति की महिमा घनी॥

भरतहि प्रसंसत बिबुध बरषत सुमन मानस मलिन से।

तुलसी बिकल सब लोग सुनि सकुचे निसागम नलिन से॥

सोरठा– -देखि दुखारी दीन दुहु समाज नर नारि सब।

मघवा महा मलीन मुए मारि मंगल चहत॥३०१॥

कपट कुचालि सीवँ सुरराजू। पर अकाज प्रिय आपन काजू॥

काक समान पाकरिपु रीती। छली मलीन कतहुँ न प्रतीती॥

प्रथम कुमत करि कपटु सँकेला। सो उचाटु सब कें सिर मेला॥

सुरमायाँ सब लोग बिमोहे। राम प्रेम अतिसय न बिछोहे॥

भय उचाट बस मन थिर नाहीं। छन बन रुचि छन सदन सोहाहीं॥

दुबिध मनोगति प्रजा दुखारी। सरित सिंधु संगम जनु बारी॥

दुचित कतहुँ परितोषु न लहहीं। एक एक सन मरमु न कहहीं॥

लखि हियँ हँसि कह कृपानिधानू। सरिस स्वान मघवान जुबानू॥

दोहा

भरतु जनकु मुनिजन सचिव साधु सचेत बिहाइ।

लागि देवमाया सबहि जथाजोगु जनु पाइ॥३०२॥

कृपासिंधु लखि लोग दुखारे। निज सनेहँ सुरपति छल भारे॥

सभा राउ गुर महिसुर मंत्री। भरत भगति सब कै मति जंत्री॥

रामहि चितवत चित्र लिखे से। सकुचत बोलत बचन सिखे से॥

भरत प्रीति नति बिनय बड़ाई। सुनत सुखद बरनत कठिनाई॥

जासु बिलोकि भगति लवलेसू। प्रेम मगन मुनिगन मिथिलेसू॥

महिमा तासु कहै किमि तुलसी। भगति सुभायँ सुमति हियँ हुलसी॥

आपु छोटि महिमा बड़ि जानी। कबिकुल कानि मानि सकुचानी॥

कहि न सकति गुन रुचि अधिकाई। मति गति बाल बचन की नाई॥

दोहा

भरत बिमल जसु बिमल बिधु सुमति चकोरकुमारि।

उदित बिमल जन हृदय नभ एकटक रही निहारि॥३०३॥

भरत सुभाउ न सुगम निगमहूँ। लघु मति चापलता कबि छमहूँ॥

कहत सुनत सति भाउ भरत को। सीय राम पद होइ न रत को॥

सुमिरत भरतहि प्रेमु राम को। जेहि न सुलभ तेहि सरिस बाम को॥

देखि दयाल दसा सबही की। राम सुजान जानि जन जी की॥

धरम धुरीन धीर नय नागर। सत्य सनेह सील सुख सागर॥

देसु काल लखि समउ समाजू। नीति प्रीति पालक रघुराजू॥

बोले बचन बानि सरबसु से। हित परिनाम सुनत ससि रसु से॥

तात भरत तुम्ह धरम धुरीना। लोक बेद बिद प्रेम प्रबीना॥

दोहा

करम बचन मानस बिमल तुम्ह समान तुम्ह तात।

गुर समाज लघु बंधु गुन कुसमयँ किमि कहि जात॥३०४॥

जानहु तात तरनि कुल रीती। सत्यसंध पितु कीरति प्रीती॥

समउ समाजु लाज गुरुजन की। उदासीन हित अनहित मन की॥

तुम्हहि बिदित सबही कर करमू। आपन मोर परम हित धरमू॥

मोहि सब भाँति भरोस तुम्हारा। तदपि कहउँ अवसर अनुसारा॥

तात तात बिनु बात हमारी। केवल गुरुकुल कृपाँ सँभारी॥

नतरु प्रजा परिजन परिवारू। हमहि सहित सबु होत खुआरू॥

जौं बिनु अवसर अथवँ दिनेसू। जग केहि कहहु न होइ कलेसू॥

तस उतपातु तात बिधि कीन्हा। मुनि मिथिलेस राखि सबु लीन्हा॥

दोहा

राज काज सब लाज पति धरम धरनि धन धाम।

गुर प्रभाउ पालिहि सबहि भल होइहि परिनाम॥३०५॥

सहित समाज तुम्हार हमारा। घर बन गुर प्रसाद रखवारा॥

मातु पिता गुर स्वामि निदेसू। सकल धरम धरनीधर सेसू॥

सो तुम्ह करहु करावहु मोहू। तात तरनिकुल पालक होहू॥

साधक एक सकल सिधि देनी। कीरति सुगति भूतिमय बेनी॥

सो बिचारि सहि संकटु भारी। करहु प्रजा परिवारु सुखारी॥

बाँटी बिपति सबहिं मोहि भाई। तुम्हहि अवधि भरि बड़ि कठिनाई॥

जानि तुम्हहि मृदु कहउँ कठोरा। कुसमयँ तात न अनुचित मोरा॥

होहिं कुठायँ सुबंधु सुहाए। ओड़िअहिं हाथ असनिहु के घाए॥

दोहा

सेवक कर पद नयन से मुख सो साहिबु होइ।

तुलसी प्रीति कि रीति सुनि सुकबि सराहहिं सोइ॥३०६॥

सभा सकल सुनि रघुबर बानी। प्रेम पयोधि अमिअ जनु सानी॥

सिथिल समाज सनेह समाधी। देखि दसा चुप सारद साधी॥

भरतहि भयउ परम संतोषू। सनमुख स्वामि बिमुख दुख दोषू॥

मुख प्रसन्न मन मिटा बिषादू। भा जनु गूँगेहि गिरा प्रसादू॥

कीन्ह सप्रेम प्रनामु बहोरी। बोले पानि पंकरुह जोरी॥

नाथ भयउ सुखु साथ गए को। लहेउँ लाहु जग जनमु भए को॥

अब कृपाल जस आयसु होई। करौं सीस धरि सादर सोई॥

सो अवलंब देव मोहि देई। अवधि पारु पावौं जेहि सेई॥

दोहा

देव देव अभिषेक हित गुर अनुसासनु पाइ।

आनेउँ सब तीरथ सलिलु तेहि कहँ काह रजाइ॥३०७॥

एकु मनोरथु बड़ मन माहीं। सभयँ सकोच जात कहि नाहीं॥

कहहु तात प्रभु आयसु पाई। बोले बानि सनेह सुहाई॥

चित्रकूट सुचि थल तीरथ बन। खग मृग सर सरि निर्झर गिरिगन॥

प्रभु पद अंकित अवनि बिसेषी। आयसु होइ त आवौं देखी॥

अवसि अत्रि आयसु सिर धरहू। तात बिगतभय कानन चरहू॥

मुनि प्रसाद बनु मंगल दाता। पावन परम सुहावन भ्राता॥

रिषिनायकु जहँ आयसु देहीं। राखेहु तीरथ जलु थल तेहीं॥

सुनि प्रभु बचन भरत सुख पावा। मुनि पद कमल मुदित सिरु नावा॥

दोहा

भरत राम संबादु सुनि सकल सुमंगल मूल।

सुर स्वारथी सराहि कुल बरषत सुरतरु फूल॥३०८॥

धन्य भरत जय राम गोसाईं। कहत देव हरषत बरिआई।

मुनि मिथिलेस सभाँ सब काहू। भरत बचन सुनि भयउ उछाहू॥

भरत राम गुन ग्राम सनेहू। पुलकि प्रसंसत राउ बिदेहू॥

सेवक स्वामि सुभाउ सुहावन। नेमु पेमु अति पावन पावन॥

मति अनुसार सराहन लागे। सचिव सभासद सब अनुरागे॥

सुनि सुनि राम भरत संबादू। दुहु समाज हियँ हरषु बिषादू॥

राम मातु दुखु सुखु सम जानी। कहि गुन राम प्रबोधीं रानी॥

एक कहहिं रघुबीर बड़ाई। एक सराहत भरत भलाई॥

दोहा

अत्रि कहेउ तब भरत सन सैल समीप सुकूप।

राखिअ तीरथ तोय तहँ पावन अमिअ अनूप॥३०९॥

भरत अत्रि अनुसासन पाई। जल भाजन सब दिए चलाई॥

सानुज आपु अत्रि मुनि साधू। सहित गए जहँ कूप अगाधू॥

पावन पाथ पुन्यथल राखा। प्रमुदित प्रेम अत्रि अस भाषा॥

तात अनादि सिद्ध थल एहू। लोपेउ काल बिदित नहिं केहू॥

तब सेवकन्ह सरस थलु देखा। किन्ह सुजल हित कूप बिसेषा॥

बिधि बस भयउ बिस्व उपकारू। सुगम अगम अति धरम बिचारू॥

भरतकूप अब कहिहहिं लोगा। अति पावन तीरथ जल जोगा॥

प्रेम सनेम निमज्जत प्रानी। होइहहिं बिमल करम मन बानी॥

दोहा

कहत कूप महिमा सकल गए जहाँ रघुराउ।

अत्रि सुनायउ रघुबरहि तीरथ पुन्य प्रभाउ॥३१०॥

कहत धरम इतिहास सप्रीती। भयउ भोरु निसि सो सुख बीती॥

नित्य निबाहि भरत दोउ भाई। राम अत्रि गुर आयसु पाई॥

सहित समाज साज सब सादें। चले राम बन अटन पयादें॥

कोमल चरन चलत बिनु पनहीं। भइ मृदु भूमि सकुचि मन मनहीं॥

कुस कंटक काँकरीं कुराईं। कटुक कठोर कुबस्तु दुराईं॥

महि मंजुल मृदु मारग कीन्हे। बहत समीर त्रिबिध सुख लीन्हे॥

सुमन बरषि सुर घन करि छाहीं। बिटप फूलि फलि तृन मृदुताहीं॥

मृग बिलोकि खग बोलि सुबानी। सेवहिं सकल राम प्रिय जानी॥

दोहा

सुलभ सिद्धि सब प्राकृतहु राम कहत जमुहात।

राम प्रान प्रिय भरत कहुँ यह न होइ बड़ि बात॥३११॥

एहि बिधि भरतु फिरत बन माहीं। नेमु प्रेमु लखि मुनि सकुचाहीं॥

पुन्य जलाश्रय भूमि बिभागा। खग मृग तरु तृन गिरि बन बागा॥

चारु बिचित्र पबित्र बिसेषी। बूझत भरतु दिब्य सब देखी॥

सुनि मन मुदित कहत रिषिराऊ। हेतु नाम गुन पुन्य प्रभाऊ॥

कतहुँ निमज्जन कतहुँ प्रनामा। कतहुँ बिलोकत मन अभिरामा॥

कतहुँ बैठि मुनि आयसु पाई। सुमिरत सीय सहित दोउ भाई॥

देखि सुभाउ सनेहु सुसेवा। देहिं असीस मुदित बनदेवा॥

फिरहिं गएँ दिनु पहर अढ़ाई। प्रभु पद कमल बिलोकहिं आई॥

दोहा

देखे थल तीरथ सकल भरत पाँच दिन माझ।

कहत सुनत हरि हर सुजसु गयउ दिवसु भइ साँझ॥३१२॥

भोर न्हाइ सबु जुरा समाजू। भरत भूमिसुर तेरहुति राजू॥

भल दिन आजु जानि मन माहीं। रामु कृपाल कहत सकुचाहीं॥

गुर नृप भरत सभा अवलोकी। सकुचि राम फिरि अवनि बिलोकी॥

सील सराहि सभा सब सोची। कहुँ न राम सम स्वामि सँकोची॥

भरत सुजान राम रुख देखी। उठि सप्रेम धरि धीर बिसेषी॥

करि दंडवत कहत कर जोरी। राखीं नाथ सकल रुचि मोरी॥

मोहि लगि सहेउ सबहिं संतापू। बहुत भाँति दुखु पावा आपू॥

अब गोसाइँ मोहि देउ रजाई। सेवौं अवध अवधि भरि जाई॥

दोहा

जेहिं उपाय पुनि पाय जनु देखै दीनदयाल।

सो सिख देइअ अवधि लगि कोसलपाल कृपाल॥३१३॥

पुरजन परिजन प्रजा गोसाई। सब सुचि सरस सनेहँ सगाई॥

राउर बदि भल भव दुख दाहू। प्रभु बिनु बादि परम पद लाहू॥

स्वामि सुजानु जानि सब ही की। रुचि लालसा रहनि जन जी की॥

प्रनतपालु पालिहि सब काहू। देउ दुहू दिसि ओर निबाहू॥

अस मोहि सब बिधि भूरि भरोसो। किएँ बिचारु न सोचु खरो सो॥

आरति मोर नाथ कर छोहू। दुहुँ मिलि कीन्ह ढीठु हठि मोहू॥

यह बड़ दोषु दूरि करि स्वामी। तजि सकोच सिखइअ अनुगामी॥

भरत बिनय सुनि सबहिं प्रसंसी। खीर नीर बिबरन गति हंसी॥

दोहा

दीनबंधु सुनि बंधु के बचन दीन छलहीन।

देस काल अवसर सरिस बोले रामु प्रबीन॥३१४॥

तात तुम्हारि मोरि परिजन की। चिंता गुरहि नृपहि घर बन की॥

माथे पर गुर मुनि मिथिलेसू। हमहि तुम्हहि सपनेहुँ न कलेसू॥

मोर तुम्हार परम पुरुषारथु। स्वारथु सुजसु धरमु परमारथु॥

पितु आयसु पालिहिं दुहु भाई। लोक बेद भल भूप भलाई॥

गुर पितु मातु स्वामि सिख पालें। चलेहुँ कुमग पग परहिं न खालें॥

अस बिचारि सब सोच बिहाई। पालहु अवध अवधि भरि जाई॥

देसु कोसु परिजन परिवारू। गुर पद रजहिं लाग छरुभारू॥

तुम्ह मुनि मातु सचिव सिख मानी। पालेहु पुहुमि प्रजा रजधानी॥

दोहा

मुखिआ मुखु सो चाहिऐ खान पान कहुँ एक।

पालइ पोषइ सकल अँग तुलसी सहित बिबेक॥३१५॥

राजधरम सरबसु एतनोई। जिमि मन माहँ मनोरथ गोई॥

बंधु प्रबोधु कीन्ह बहु भाँती। बिनु अधार मन तोषु न साँती॥

भरत सील गुर सचिव समाजू। सकुच सनेह बिबस रघुराजू॥

प्रभु करि कृपा पाँवरीं दीन्हीं। सादर भरत सीस धरि लीन्हीं॥

चरनपीठ करुनानिधान के। जनु जुग जामिक प्रजा प्रान के॥

संपुट भरत सनेह रतन के। आखर जुग जुन जीव जतन के॥

कुल कपाट कर कुसल करम के। बिमल नयन सेवा सुधरम के॥

भरत मुदित अवलंब लहे तें। अस सुख जस सिय रामु रहे तें॥

दोहा

मागेउ बिदा प्रनामु करि राम लिए उर लाइ।

लोग उचाटे अमरपति कुटिल कुअवसरु पाइ॥३१६॥

सो कुचालि सब कहँ भइ नीकी। अवधि आस सम जीवनि जी की॥

नतरु लखन सिय सम बियोगा। हहरि मरत सब लोग कुरोगा॥

रामकृपाँ अवरेब सुधारी। बिबुध धारि भइ गुनद गोहारी॥

भेंटत भुज भरि भाइ भरत सो। राम प्रेम रसु कहि न परत सो॥

तन मन बचन उमग अनुरागा। धीर धुरंधर धीरजु त्यागा॥

बारिज लोचन मोचत बारी। देखि दसा सुर सभा दुखारी॥

मुनिगन गुर धुर धीर जनक से। ग्यान अनल मन कसें कनक से॥

जे बिरंचि निरलेप उपाए। पदुम पत्र जिमि जग जल जाए॥

दोहा

तेउ बिलोकि रघुबर भरत प्रीति अनूप अपार।

भए मगन मन तन बचन सहित बिराग बिचार॥३१७॥

जहाँ जनक गुर मति भोरी। प्राकृत प्रीति कहत बड़ि खोरी॥

बरनत रघुबर भरत बियोगू। सुनि कठोर कबि जानिहि लोगू॥

सो सकोच रसु अकथ सुबानी। समउ सनेहु सुमिरि सकुचानी॥

भेंटि भरत रघुबर समुझाए। पुनि रिपुदवनु हरषि हियँ लाए॥

सेवक सचिव भरत रुख पाई। निज निज काज लगे सब जाई॥

सुनि दारुन दुखु दुहूँ समाजा। लगे चलन के साजन साजा॥

प्रभु पद पदुम बंदि दोउ भाई। चले सीस धरि राम रजाई॥

मुनि तापस बनदेव निहोरी। सब सनमानि बहोरि बहोरी॥

दोहा

लखनहि भेंटि प्रनामु करि सिर धरि सिय पद धूरि।

चले सप्रेम असीस सुनि सकल सुमंगल मूरि॥३१८॥

सानुज राम नृपहि सिर नाई। कीन्हि बहुत बिधि बिनय बड़ाई॥

देव दया बस बड़ दुखु पायउ। सहित समाज काननहिं आयउ॥

पुर पगु धारिअ देइ असीसा। कीन्ह धीर धरि गवनु महीसा॥

मुनि महिदेव साधु सनमाने। बिदा किए हरि हर सम जाने॥

सासु समीप गए दोउ भाई। फिरे बंदि पग आसिष पाई॥

कौसिक बामदेव जाबाली। पुरजन परिजन सचिव सुचाली॥

जथा जोगु करि बिनय प्रनामा। बिदा किए सब सानुज रामा॥

नारि पुरुष लघु मध्य बड़ेरे। सब सनमानि कृपानिधि फेरे॥

दोहा

भरत मातु पद बंदि प्रभु सुचि सनेहँ मिलि भेंटि।

बिदा कीन्ह सजि पालकी सकुच सोच सब मेटि॥३१९॥

परिजन मातु पितहि मिलि सीता। फिरी प्रानप्रिय प्रेम पुनीता॥

करि प्रनामु भेंटी सब सासू। प्रीति कहत कबि हियँ न हुलासू॥

सुनि सिख अभिमत आसिष पाई। रही सीय दुहु प्रीति समाई॥

रघुपति पटु पालकीं मगाईं। करि प्रबोधु सब मातु चढ़ाई॥

बार बार हिलि मिलि दुहु भाई। सम सनेहँ जननी पहुँचाई॥

साजि बाजि गज बाहन नाना। भरत भूप दल कीन्ह पयाना॥

हृदयँ रामु सिय लखन समेता। चले जाहिं सब लोग अचेता॥

बसह बाजि गज पसु हियँ हारें। चले जाहिं परबस मन मारें॥

दोहा

गुर गुरतिय पद बंदि प्रभु सीता लखन समेत।

फिरे हरष बिसमय सहित आए परन निकेत॥३२०॥

बिदा कीन्ह सनमानि निषादू। चलेउ हृदयँ बड़ बिरह बिषादू॥

कोल किरात भिल्ल बनचारी। फेरे फिरे जोहारि जोहारी॥

प्रभु सिय लखन बैठि बट छाहीं। प्रिय परिजन बियोग बिलखाहीं॥

भरत सनेह सुभाउ सुबानी। प्रिया अनुज सन कहत बखानी॥

प्रीति प्रतीति बचन मन करनी। श्रीमुख राम प्रेम बस बरनी॥

तेहि अवसर खग मृग जल मीना। चित्रकूट चर अचर मलीना॥

बिबुध बिलोकि दसा रघुबर की। बरषि सुमन कहि गति घर घर की॥

प्रभु प्रनामु करि दीन्ह भरोसो। चले मुदित मन डर न खरो सो॥

दोहा

सानुज सीय समेत प्रभु राजत परन कुटीर।

भगति ग्यानु बैराग्य जनु सोहत धरें सरीर॥३२१॥

मुनि महिसुर गुर भरत भुआलू। राम बिरहँ सबु साजु बिहालू॥

प्रभु गुन ग्राम गनत मन माहीं। सब चुपचाप चले मग जाहीं॥

जमुना उतरि पार सबु भयऊ। सो बासरु बिनु भोजन गयऊ॥

उतरि देवसरि दूसर बासू। रामसखाँ सब कीन्ह सुपासू॥

सई उतरि गोमतीं नहाए। चौथें दिवस अवधपुर आए।

जनकु रहे पुर बासर चारी। राज काज सब साज सँभारी॥

सौंपि सचिव गुर भरतहि राजू। तेरहुति चले साजि सबु साजू॥

नगर नारि नर गुर सिख मानी। बसे सुखेन राम रजधानी॥

दोहा-

राम दरस लगि लोग सब करत नेम उपबास।

तजि तजि भूषन भोग सुख जिअत अवधि कीं आस॥३२२॥

सचिव सुसेवक भरत प्रबोधे। निज निज काज पाइ पाइ सिख ओधे॥

पुनि सिख दीन्ह बोलि लघु भाई। सौंपी सकल मातु सेवकाई॥

भूसुर बोलि भरत कर जोरे। करि प्रनाम बय बिनय निहोरे॥

ऊँच नीच कारजु भल पोचू। आयसु देब न करब सँकोचू॥

परिजन पुरजन प्रजा बोलाए। समाधानु करि सुबस बसाए॥

सानुज गे गुर गेहँ बहोरी। करि दंडवत कहत कर जोरी॥

आयसु होइ त रहौं सनेमा। बोले मुनि तन पुलकि सपेमा॥

समुझव कहब करब तुम्ह जोई। धरम सारु जग होइहि सोई॥

दोहा

सुनि सिख पाइ असीस बड़ि गनक बोलि दिनु साधि।

सिंघासन प्रभु पादुका बैठारे निरुपाधि॥३२३॥

राम मातु गुर पद सिरु नाई। प्रभु पद पीठ रजायसु पाई॥

नंदिगावँ करि परन कुटीरा। कीन्ह निवासु धरम धुर धीरा॥

जटाजूट सिर मुनिपट धारी। महि खनि कुस साँथरी सँवारी॥

असन बसन बासन ब्रत नेमा। करत कठिन रिषिधरम सप्रेमा॥

भूषन बसन भोग सुख भूरी। मन तन बचन तजे तिन तूरी॥

अवध राजु सुर राजु सिहाई। दसरथ धनु सुनि धनदु लजाई॥

तेहिं पुर बसत भरत बिनु रागा। चंचरीक जिमि चंपक बागा॥

रमा बिलासु राम अनुरागी। तजत बमन जिमि जन बड़भागी॥

दोहा

राम पेम भाजन भरतु बड़े न एहिं करतूति।

चातक हंस सराहिअत टेंक बिबेक बिभूति॥३२४॥

देह दिनहुँ दिन दूबरि होई। घटइ तेजु बलु मुखछबि सोई॥

नित नव राम प्रेम पनु पीना। बढ़त धरम दलु मनु न मलीना॥

जिमि जलु निघटत सरद प्रकासे। बिलसत बेतस बनज बिकासे॥

सम दम संजम नियम उपासा। नखत भरत हिय बिमल अकासा॥

ध्रुव बिस्वास अवधि राका सी। स्वामि सुरति सुरबीथि बिकासी॥

राम पेम बिधु अचल अदोषा। सहित समाज सोह नित चोखा॥

भरत रहनि समुझनि करतूती। भगति बिरति गुन बिमल बिभूती॥

बरनत सकल सुकचि सकुचाहीं। सेस गनेस गिरा गमु नाहीं॥

दोहा

नित पूजत प्रभु पाँवरी प्रीति न हृदयँ समाति॥

मागि मागि आयसु करत राज काज बहु भाँति॥३२५॥

पुलक गात हियँ सिय रघुबीरू। जीह नामु जप लोचन नीरू॥

लखन राम सिय कानन बसहीं। भरतु भवन बसि तप तनु कसहीं॥

दोउ दिसि समुझि कहत सबु लोगू। सब बिधि भरत सराहन जोगू॥

सुनि ब्रत नेम साधु सकुचाहीं। देखि दसा मुनिराज लजाहीं॥

परम पुनीत भरत आचरनू। मधुर मंजु मुद मंगल करनू॥

हरन कठिन कलि कलुष कलेसू। महामोह निसि दलन दिनेसू॥

पाप पुंज कुंजर मृगराजू। समन सकल संताप समाजू।

जन रंजन भंजन भव भारू। राम सनेह सुधाकर सारू॥

छंद– सिय राम प्रेम पियूष पूरन होत जनमु न भरत को।

मुनि मन अगम जम नियम सम दम बिषम ब्रत आचरत को॥

दुख दाह दारिद दंभ दूषन सुजस मिस अपहरत को।

कलिकाल तुलसी से सठन्हि हठि राम सनमुख करत को॥

सोरठा– -भरत चरित करि नेमु तुलसी जो सादर सुनहिं।

सीय राम पद पेमु अवसि होइ भव रस बिरति॥३२६॥

मासपारायण, इक्कीसवाँ विश्राम

इति श्रीमद्रामचरितमानसे सकलकलिकलुषविध्वंसने

द्वितीयः सोपानः समाप्तः।

(अयोध्याकाण्ड समाप्त)